ವರ್ಷದ ಆರಂಭದಿಂದಲೇ ಪರೀಕ್ಷೆಗೆ ತಯಾರಿ ಹೇಗೆ? ಕೆಲವು ಸರಳ ಸಲಹೆಗಳು

 

ಇನ್ನೇನು ಮತ್ತೊಂದು ಹೊಸ ಶೈಕ್ಷಣಿಕ ವರ್ಷ ಆರಂಭವಾಗಿದೆ. ಕೆಲವರು ಹಿಂದಿನ ವರ್ಷ ಪರೀಕ್ಷೆಯಲ್ಲಿ ಉತ್ತಮ ಅಂಕಗಳನ್ನು ಪಡೆದು ಮುಂದೆ ಸಾಗಿದರೆ, ಇನ್ನೂ ಕೆಲವರಿಗೆ ಕಳೆದ ವರ್ಷ ಸರಿಯಾಗಿ ಓದಲಿಲ್ಲ ಅಥವಾ ಇನ್ನೂ ಚೆನ್ನಾಗಿ ಮಾಡಬಹುದಿತ್ತೇನೋ ಅಂಬ ಹಳಹಳಿ ಇದೆ. ಉತ್ತಮ ಫಲಿತಾಂಶಕ್ಕಾಗಿ, ಕೊನೆಯ ಕ್ಷಣದಲ್ಲಿ ಓದುವುದಕ್ಕಿಂತ ವರ್ಷದ ಆರಂಭದಿಂದಲೇ ಸರಿಯಾದ ಯೋಜನೆಯೊಂದಿಗೆ ತಯಾರಿ ಮಾಡುವುದು ಅತ್ಯಂತ ಮುಖ್ಯ. ಇದರಿಂದ ಒತ್ತಡ ಕಡಿಮೆ ಆಗುತ್ತದೆ ಮತ್ತು ವಿಷಯಗಳು ಚೆನ್ನಾಗಿ ಅರ್ಥವಾಗುತ್ತವೆ. ಇಲ್ಲಿ ವಿದ್ಯಾರ್ಥಿಗಳಿಗೆ ಸಹಾಯ ಮಾಡುವ ಕೆಲವು  ಮುಖ್ಯ ಸಲಹೆಗಳು ನೀಡಲಾಗಿದೆ.

 

 ಸ್ಪಷ್ಟವಾದ ಅಧ್ಯಯನ ಯೋಜನೆ ರೂಪಿಸಿರಿ

ವರ್ಷದ ಆರಂಭದಲ್ಲೇ ಪ್ರತಿಯೊಂದು ವಿಷಯಕ್ಕೂ ಸಮಯ ಹಂಚಿಕೆ ಮಾಡಿ. ಕಠಿಣವಾದ ವಿಷಯಗಳಿಗೆ ಹೆಚ್ಚಿನ ಸಮಯವನ್ನು ಮೀಸಲಿಡಿ. ದಿನವೂ 2–3 ವಿಷಯಗಳನ್ನು ಓದುವಂತೆ ಯೋಜನೆ ಮಾಡಿಕೊಳ್ಳಿ. ಯೋಜನೆ ಮಾಡುವಾಗ ತುಂಬಾ ಕಠಿಣವಾದ ವೇಳಾಪಟ್ಟಿ ಬೇಡ. ಅದರಲ್ಲಿ ಮನರಂಜನೆಗೆ ಅಥವಾ ಆಟೋಟಗಳಿಗೂ ಸಮಯವಿರಲಿ. ತುಂಬಾ ಕಠಿಣವಾದ ವೇಳಾಪಟ್ಟಿಯನ್ನು ಪಾಲಿಸಲಾಗದೇ ಕೊನೆಗೆ ನಿಮ್ಮ  ಯೋಜನೆ ವಿಫಲವಾಗುವ ಸಾಧ್ಯತೆಯೇ ಹೆಚ್ಚು.  ವಾರದ ಕೊನೆಯಲ್ಲಿ ಓದಿದ ವಿಷಯಗಳನ್ನು ಮರುಪರಿಶೀಲನೆ (revision) ಮಾಡುವುದು ಮುಖ್ಯ.  ಈ ರೀತಿಯ ಯೋಜನೆ ನಿಮಗೆ ನಿಯಮಿತ ಅಭ್ಯಾಸವನ್ನು ನೀಡುತ್ತದೆ.

ದಿನನಿತ್ಯ ಅಭ್ಯಾಸ ಮತ್ತು ಟಿಪ್ಪಣಿಗಳು

ಪ್ರತಿ ಪಾಠವನ್ನು ಓದಿದ ನಂತರ, ಮುಖ್ಯ ಅಂಶಗಳನ್ನು ಒಂದು ಪ್ರತ್ಯೇಕ ಪುಸ್ತಕದಲ್ಲಿ ನಿಮ್ಮದೇ ಪದಗಳಲ್ಲಿ ಟಿಪ್ಪಣಿಯನ್ನು ಬರೆದಿಟ್ಟುಕೊಳ್ಳಿ. ಮುಖ್ಯವಾದ ಗಣಿತ, ವಿಜ್ಞಾನದ ಸೂತ್ರಗಳು, ಇತಿಹಾಸದ ದಿನಾಂಕಗಳು, ಪ್ರಮುಖ ವ್ಯಕ್ತಿಗಳ ಹೆಸರು ಇವುಗಳನ್ನು ಅಚ್ಚುಕಟ್ಟಾಗಿ ಪಟ್ಟಿ ಮಾಡಿಟ್ಟುಕೊಳ್ಳಿ.  ಇದು ಪರೀಕ್ಷೆಯ ಸಮಯದಲ್ಲಿ ಬೇಗನೆ ಮರುಪಠಣ ಮಾಡಲು ಸಹಾಯ ಮಾಡುತ್ತದೆ. ದಿನನಿತ್ಯ 1–2 ಗಂಟೆಗಳ ನಿಯಮಿತ ಓದು ನಿಮ್ಮ ಜ್ಞಾನವನ್ನು ಗಟ್ಟಿಗೊಳಿಸುತ್ತದೆ. ಇಲ್ಲಿ ನಿಯಮಿತತೆ ತುಂಬಾ ಮುಖ್ಯವಾದುದು.

 ಹಿಂದಿನ ಪ್ರಶ್ನೆಪತ್ರಿಕೆಗಳ ಅಭ್ಯಾಸ

ಹಿಂದಿನ ವರ್ಷದ ಪ್ರಶ್ನೆಪತ್ರಿಕೆಗಳನ್ನು ಅಭ್ಯಾಸ ಮಾಡುವುದರಿಂದ ಪರೀಕ್ಷೆಯ ಮಾದರಿ (pattern) ತಿಳಿಯುತ್ತದೆ. ಯಾವ ವಿಷಯಗಳಿಂದ ಹಾಗೂ ಯಾವ ಮಾದರಿಯ ಪ್ರಶ್ನೆಗಳು ಹೆಚ್ಚು ಬರುತ್ತವೆ ಎಂಬುದು ಸ್ಪಷ್ಟವಾಗುತ್ತದೆ. ವಾರಕ್ಕೆ ಒಂದು ಬಾರಿ ಮಾದರಿ ಪರೀಕ್ಷೆ (mock test) ತೆಗೆದುಕೊಳ್ಳುವುದು ಉತ್ತಮ. ಇದರಿಂದ ಯಾವ ರೀತಿಯ ಪ್ರಶ್ನೆಗಳನ್ನು ಎದುರಿಸುವುದರಲ್ಲಿ ಎಡುವುತ್ತಿದ್ದೇವೆ ಎನ್ನುವುದು ತಿಳಿದು ಆ ರೀತಿಯಾಗಿ ಸಿದ್ಧತೆ ಮಾಡಿಕೊಳ್ಳುವುದಕ್ಕೆ ಸಾಧ್ಯವಾಗುತ್ತದೆ. ಯಾವುದಾದರೂ ವಿಷಯ ಕಷ್ಟವೆನಿಸಿದರೆ ಅದನ್ನು ಆವಾಗಲೇ ತಿಳಿದುಕೊಳ್ಳಬಹುದು. ಅಂತರ್ಜಾಲದಲ್ಲಿ ಈ ರೀತಿಯ ಮಾದರಿ ಪ್ರಶ್ನೆಪತ್ರಿಕೆಗಳು ಸಿಗುತ್ತವೆ.

ಸಮಯ ನಿರ್ವಹಣೆ ಮತ್ತು ಆರೋಗ್ಯದ ಗಮನ

ಪಾಠಗಳ ಜೊತೆಗೆ ಸರಿಯಾದ ಸಮಯಕ್ಕೆ ವಿಶ್ರಾಂತಿ ಮತ್ತು ಆರೋಗ್ಯದ ಮೇಲೆ ಗಮನ ಕೊಡುವುದು ಅಷ್ಟೇ ಗಮನಾರ್ಹವಾಗಿದೆ . ಪ್ರತಿದಿನ ಸರಿಯಾದ ನಿದ್ರೆ, ಪೌಷ್ಟಿಕ ಆಹಾರ ಮತ್ತು ಸ್ವಲ್ಪ ವ್ಯಾಯಾಮ ಮಾಡುವುದು ಗ್ರಹಣಶಕ್ತಿ ಮತ್ತು ಏಕಾಗ್ರತೆಯನ್ನು  ಹೆಚ್ಚಿಸುತ್ತದೆ. ಓದುವ ಸಮಯವನ್ನು ಸರಿಯಾಗಿ ಹಂಚಿಕೊಳ್ಳುವುದು ಪರೀಕ್ಷೆಯಲ್ಲಿ ಉತ್ತಮ ಫಲಿತಾಂಶ ನೀಡುತ್ತದೆ.

ವರ್ಷದ ಆರಂಭದಿಂದಲೇ ಸರಿಯಾದ ತಯಾರಿ ಮಾಡಿದರೆ ಪರೀಕ್ಷೆ ಸುಲಭವಾಗುತ್ತದೆ. ಈ ಮೇಲೆ ನೀಡಿದ ಸರಳ ಸಲಹೆಗಳನ್ನು ಅನುಸರಿಸಿ, ನಿಮ್ಮ ಗುರಿಯನ್ನು ಸಾಧಿಸಬಹುದು. ನಿಯಮಿತ ಅಭ್ಯಾಸ ಮತ್ತು ಧೈರ್ಯವೇ ಯಶಸ್ಸಿನ ಕೀಲಿಕೈ.

ಯೋಗಾಭ್ಯಾಸದಿಂದಾಗುವ ಪ್ರಯೋಜನಗಳು

 

ಯೋಗ ಒಂದು ಸರಳವಾದ ಸುರಕ್ಷಿತವಾದ ಹಾಗೂ ಯಾವ ವಯಸ್ಸಿನವರೂ ತಮ್ಮ ಆರೋಗ್ಯ ರಕ್ಷಿಸಿಕೊಳ್ಳಲು ಮಾಡಬಹುದಾದಂತಹ ಸುಲಭವಾದ ಸಾಧನ. ಪ್ರತಿನಿತ್ಯವೂ ದೇಹ ಅಭ್ಯಾಸ ಹಾಗೂ ನಿಯಮಿತ ಉಸಿರಾಟದ ಅಭ್ಯಾಸವನ್ನು ಕಲಿತರೆ ಯೋಗವನ್ನು ಯಾರೂ ಸಹ ಮಾಡಬಹುದು. ಇದರಿಂದ ನಮ್ಮ ದೇಹ, ಮನಸ್ಸು ಹಾಗೂ ಆತ್ಮಗಳ ನಡುವಿನ ವ್ಯತ್ಯಾಸ ತಪ್ಪಿಸಿ ಒಂದಕ್ಕೊಂದನ್ನು ಜೋಡಿಸಬಹುದು. ಇದರಿಂದ ಅನಾರೋಗ್ಯವಾಗುವುದು ಹಾಗೂ ಮಾನಸಿಕ ಒತ್ತಡದ ಸಂದರ್ಭಗಳು ತಪ್ಪುತ್ತದೆ. ದೇಹ ಹಾಗೂ ಮಾನಸಿಕ ದೃಢತೆ ಮತ್ತು ಮಾನಸಿಕ ಶಾಂತಿ, ಜ್ಞಾನ ಪಡೆಯಬಹುದು. ಆಂತರಿಕ ಶಕ್ತಿಯಿಂದ ನಾವು ಎಂತಹ ಕಠಿಣ ಪರಿಸ್ಥಿತಿಯಲ್ಲೂ ಸ್ಥಿಮಿತ ಕಳೆದುಕೊಳ್ಳದೇ ಮುನ್ನುಗ್ಗಬಹುದು ಹಾಗೂ ಆರೋಗ್ಯ ಜೀವನ ನಡೆಸಬಹುದು.

ಪ್ರತಿದಿನವೂ ಯೋಗದ ಅಭ್ಯಾಸ ಮಾಡುವುದರಿಂದ ಬಾಹ್ಯ ಹಾಗೂ ಆಂತರಿಕವಾಗಿ ವಿಶ್ರಾಂತಿ ಸಿಗುತ್ತದೆ ಮತ್ತು ಅನೇಕ ತರಹದ ನೋವುಗಳಿಂದ ನಿವಾರಣೆ ಪಡೆಯಬಹುದಾಗಿದೆ. ವಿವಿಧ ಭಂಗಿಗಳು ಹಾಗೂ ಆಸನಗಳ ಅಭ್ಯಾಸದಿಂದ ದೇಹ ಮತ್ತು ಮನಸ್ಸನ್ನು ಗಟ್ಟಿಗೊಳಿಸಬಹುದು ಹಾಗೂ ನಮ್ಮ ಮೆದುಳನ್ನು ಚುರುಕುಗೊಳಿಸಿ ನಮ್ಮ ಏಕಾಗ್ರತೆಯನ್ನು ಹೆಚ್ಚಿಸುತ್ತದೆ. ನಮ್ಮ ಭಾವನೆಗಳನ್ನು ನಮ್ಮ ಹಿಡಿತದಲ್ಲಿಡಲು ಸಹಕರಿಸುತ್ತದೆ. ನಾವು ನಿಸರ್ಗದೊಡನೆ ಬೆರೆತಂತೆ ಭಾಸವಾಗುತ್ತದೆ. ಆದ್ದರಿಂದ ನಾವು ಕೂಡ ಒಳ್ಳೆಯ ಯೋಜನೆಗಳನ್ನೇ ಮಾಡುತ್ತೇವೆ. ಧ್ಯಾನ ಮಾಡುವುದರಿಂದ ಏಕಾಗ್ರತೆ ಹೆಚ್ಚಾಗಿ ನಮ್ಮೊಳಗೆ ಶಾಂತಿ ನೆಲೆಸುತ್ತದೆ.

ಯೋಗದ ಅಭ್ಯಾಸದಿಂದ ನಾವು ಪ್ರಾಯೋಗಿಕವಾಗಿ ಆಧ್ಯಾತ್ಮದೆಡೆಗೆ ಸಾಗಿದಂತೆ ಆಗುತ್ತದೆ. ಆದ್ದರಿಂದ ನಾವು ಸ್ವಯಂ ಶಿಸ್ತು ಹಾಗೂ ಸ್ವಯಂ ಅರಿವಿನೆಡೆಗೆ ಸಾಗುತ್ತೇವೆ. ಯೋಗವನ್ನು ಅಭ್ಯಾಸ ಮಾಡುವುದಕ್ಕೆ ವಯಸ್ಸು, ಧರ್ಮ, ಮೇಲು ಕೀಳಿನ ಅಡೆತಡೆಗಳಿಲ್ಲ. ಯಾರು ಬೇಕಾದರೂ ಅಭ್ಯಸಿಸಬಹುದು. ಯಾವುದಾದರೂ ಆರೋಗ್ಯ ಸಂಬಂಧಿ ವ್ಯಾಧಿಯಿಂದ ನರಳುತ್ತಿರುವವರು ಕೂಡ ಸಂಬಂಧಿಸಿದ ಆಸನ ಅಭ್ಯಾಸ ಮಾಡಿದರೆ ಅವರು ಕೂಡ ತಮ್ಮ ಆರೋಗ್ಯದಲ್ಲಿ ಸುಧಾರಣೆ ಕಾಣಬಹುದು. ಆದ್ದರಿಂದ ನಮ್ಮ ದೇಶದ ಪ್ರಧಾನಮಂತ್ರಿಯಾದ ಶ್ರೀ ನರೇಂದ್ರ ಮೋದಿಯವರು ಇಪ್ಪತ್ತೊಂದು ಜೂನ್ 21 ರಂದು 'ವಿಶ್ವ ಯೋಗ ದಿನ'ವನ್ನಾಗಿ ಘೋಷಿಸಿ ಇದರ ಪ್ರಯೋಜನವನ್ನು ಇಡೀ ವಿಶ್ವಕ್ಕೆ ಸಾರಿದ್ದಾರೆ.

ನಮ್ಮ ದೇಶದ ಪುರಾತನ ಅಭ್ಯಾಸವಾದ ಯೋಗವನ್ನು ಯೋಗಿಗಳು ಅಭ್ಯಾಸ ಮಾಡಿ ತಮ್ಮ ಆಯಸ್ಸನ್ನು ವೃದ್ಧಿಸಿಕೊಂಡಿದ್ದಾರೆ. ಯೋಗವು ವಿಶ್ವಕ್ಕೆ ನಮ್ಮ ದೇಶ ನೀಡಿದ ಅದ್ಭುತ ಕೊಡುಗೆಯಾಗಿದೆ. ಇದರ ಅನುಕೂಲವನ್ನು ಎಲ್ಲರೂ ಪಡೆಯಬಹುದಾಗಿದೆ.

ಮಳೆಗಾಲದಲ್ಲಿ ಆರೋಗ್ಯ

 

ಮಳೆಗಾಲ ಶುರುವಾಯಿತೆಂದರೆ ಸಣ್ಣವರಿಂದ ಹಿಡಿದು ದೊಡ್ಡವರವರೆಗೂ ಬಹಳಷ್ಟು ಖುಷಿ. ಮಳೆಯಲ್ಲಿ ನೆನೆದು ಆಟವಾಡುವುದೆಂದರೆ ಏನೋ ಒಂದು ರೀತಿಯ ಪುಳಕ. ಆದರೆ, ಮಳೆಗಾಲದಲ್ಲಿ ರೋಗ ನಿರೋಧಕ ಶಕ್ತಿ ಕಡಿಮೆ ಇರುತ್ತದೆ. ಇಂತಹ ಸಂದರ್ಭಗಳಲ್ಲಿ ಮಳೆಯಲ್ಲಿ ನೆನೆಯಲಿ ಅಥವಾ ನೆನೆಯದೆ ಇರಲಿ ನಮ್ಮ ದೇಹಕ್ಕೆ ಅನೇಕ ಸೋಂಕುಗಳು ತಗಲುವ ಸಾಧ್ಯತೆ ಹೆಚ್ಚಾಗಿರುತ್ತದೆ. ನೀರಿನಿಂದ ಹಾಗೂ ಗಾಳಿಯಿಂದ ಹರಡುವಂತಹ ರೋಗಗಳಾದ ಸಾಮಾನ್ಯ ನೆಗಡಿ, ಅತಿಸಾರ, ಜಾಂಡೀಸ್ ಮತ್ತು ಮಲೇರಿಯಾ ಹರಡುವ ಸಾಧ್ಯತೆ ಹೆಚ್ಚಾಗಿರುತ್ತದೆ. ಆದ್ದರಿಂದ ಮಳೆಗಾಲದಲ್ಲಿ ಆರೋಗ್ಯದ ಕಡೆಗೆ ಹೆಚ್ಚಿನ ಗಮನ ಹರಿಸಬೇಕು. 

ಮಳೆಗಾಲದ ರೋಗಗಳಿಗೆ ಮೂಲ ಕಾರಣವೆಂದರೆ, ಶುದ್ಧವಲ್ಲದ ನೀರು ಕುಡಿಯುವುದರಿಂದ ರೋಗಗಳು ಬೇಗನೆ ನಮ್ಮ ದೇಹಕ್ಕೆ ಅಂಟಿಕೊಳ್ಳುತ್ತವೆ. ಹಾಗಾಗಿ ಮಳೆಗಾಲದಲ್ಲಿ ಕುದಿಸಿ ಆರಿಸಿದ, ಶುದ್ಧೀಕರಿಸಿದ ಅಥವಾ ಶೋಧಿಸಿದ ನೀರನ್ನು ಕುಡಿಯುವ ಮೂಲಕ ಆರೋಗ್ಯವನ್ನು ಸಮತೋಲನದಲ್ಲಿ ಇಟ್ಟುಕೊಳ್ಳಬಹುದು. ನಾವು ಬೇರೆಡೆ ಪ್ರಯಾಣಿಸುವಾಗಲೂ ಮನೆಯಿಂದ ಶುದ್ಧೀಕರಿಸಿದ ಅಥವಾ ಕುದಿಸಿ ಆರಿಸಿದ ನೀರನ್ನು ತೆಗೆದುಕೊಂಡು ಹೋಗಬೇಕು. ಹಾಗೂ ಖನಿಜ ಯುಕ್ತ ನೀರನ್ನೇ ಬಳಸಬೇಕು.

ಬಹುತೇಕ ರೋಗಗಳು ನೀರಿನಿಂದ ಹರಡುವುದರಿಂದ, ಹೊರಗಡೆ ತಿನ್ನುವಂತಹ ಆಹಾರ ಪದಾರ್ಥಗಳನ್ನು ಸಿದ್ಧ ಪಡಿಸಲು ಅಥವಾ ಬೀದಿ ಬದಿಯ ಆಹಾರ ತಯಾರಿಕೆಗೆ ಯಾವ ನೀರನ್ನು ಬಳಸಿರುತ್ತಾರೆ ಎಂದು ನಾವು ತಿಳಿಯುವುದು ಕಷ್ಟ. ಆದ್ದರಿಂದ ಹೊರಗೆ ಹೋಗುವಾಗ ಮನೆಯ ಆಹಾರವನ್ನು ತೆಗೆದುಕೊಂಡು ಹೋಗುವುದು ಒಳ್ಳೆಯದು. ಹೊರಗಡೆಯ ಆಹಾರ ಸೇವಿಸದಿರುವುದೇ ಆರೋಗ್ಯಕ್ಕೆ ಹಿತಕಾರಿ. ಮಳೆಗಾಲದಲ್ಲಿ ವಾತಾವರಣ ತೇವಾಂಶದಿಂದ ಕೂಡಿದ ಹಾಗೂ ಒದ್ದೆಯಿಂದ ಇರುತ್ತದೆ. ಇದು ಬ್ಯಾಕ್ಟೀರಿಯಾ ಸಂತಾನೋತ್ಪತ್ತಿಗೆ ಸೂಕ್ತ ವಾತಾವರಣವನ್ನು ಒದಗಿಸುತ್ತದೆ. ಆದ್ದರಿಂದ ಯಾವುದೇ ಹಳೆಯ ಆಹಾರ ಅಥವಾ ಉಳಿದಂತಹ ಆಹಾರವನ್ನು ಸೇವಿಸದಿರುವುದು ಒಳ್ಳೆಯದು.

ತೆರೆದಿಟ್ಟ ಹಣ್ಣು ಅಥವಾ ತರಕಾರಿಗಳು ನೊಣ ಮತ್ತು ಇತರ ಕೀಟಗಳನ್ನು ಆಕರ್ಷಿಸುತ್ತವೆ. ಇದು ಸೋಂಕು ಅಥವಾ ರೋಗ ಹರಡಲು ಕಾರಣವಾಗಬಹುದು. ಹಾಗಾಗಿ ತಾಜಾ ಹಣ್ಣು ಮತ್ತು ತರಕಾರಿಗಳನ್ನು ಖರೀದಿಸಿ ಮನೆಗೆ ತಂದು ಸ್ವಚ್ಚಗೊಳಿಸಿ ಸಾಕಷ್ಟು ಬೇಯಿಸಿ ಸೇವಿಸುವುದು ಆರೋಗ್ಯದ ದೃಷ್ಟಿಯಿಂದ ಒಳ್ಳೆಯದು.

ಮಳೆಗಾಲದಲ್ಲಿ ಒದ್ದೆಯಾಗದಂತೆ ಎಚ್ಚರ ವಹಿಸುವುದು ಅಗತ್ಯವಾಗಿದೆ. ಸಾಧ್ಯವಿದ್ದಷ್ಟು ಬೆಚ್ಚಗಿನ ಬಟ್ಟೆಗಳನ್ನು ಹಾಗೂ ಒಣಗಿದ ಬಟ್ಟೆಗಳನ್ನು ಧರಿಸುವುದು ಒಳ್ಳೆಯದು. ಒಂದು ವೇಳೆ ಒದ್ದೆಯಾದರೂ ತಕ್ಷಣ ಮನೆಗೆ ತೆರಳಿ ತಮ್ಮ ಕೈಕಾಲುಗಳನ್ನು ತೊಳೆದುಕೊಂಡು ಬಟ್ಟೆ ಬದಲಿಸಿ ಒಣಗಿದ ಬಟ್ಟೆಯನ್ನು ಧರಿಸುವುದು ಉತ್ತಮ. ಇದರಿಂದ ನೆಗಡಿಯಂತಹ ಸಾಮಾನ್ಯ ಸೋಂಕಿನಿಂದ ನಾವು ದೂರವಿರಬಹುದಾಗಿದೆ.

ಪರಿಸರದ ಸಂರಕ್ಷಣೆ

ಪರಿಸರ ಎಂದರೆ ನಮ್ಮ ಸುತ್ತಮುತ್ತಲು ಇರುವ ವಾತಾವರಣ ಉದಾಹರಣೆಗೆ  ಕಾಡು, ಗುಡ್ಡಬೆಟ್ಟಗಳು, ಭೂಮಿ, ಆಕಾಶ, ಪಶು ಪಕ್ಷಿಗು ಇತ್ಯಾದಿ.  ಮಾನವನೂ ಸಹ ಇದೆ ಪರಿಸರದ ಒಂದು ಭಾಗ. ಇನ್ನು ಪರಿಸರ ಮಾಲಿನ್ಯ ಎಂದರೆ ಅಪಾಯಕಾರಿ ಹಾಗೂ ವಿಷಕಾರಕವಾದ ವಸ್ತುಗಳು ಪರಿಸರಕ್ಕೆ ಸೇರುವುದು. ಈ ವಸ್ತುಗಳು ಭೂಮಿಯ ಮೇಲಿನ ಎಲ್ಲ ಜೀವಿಗಳ ಮೇಲೂ ದುಷ್ಪರಿಣಾಮ ಉಂಟು ಮಾಡುತ್ತವೆ ಹಾಗೂ ನೈಸರ್ಗಿಕವಾಗಿ ನಡೆಯುವ ಜೈವಿಕ ಚಕ್ರದ ಮೇಲೂ ಪರಿಣಾಮ ಉಂಟು ಮಾಡುತ್ತದೆ. ಪರಿಸರ ಮಾಲಿನ್ಯಕ್ಕೆ ನೈಸರ್ಗಿಕ ಕಾರಣಗಳೂ ಇವೆ ಮತ್ತು ಮಾನವ ನಿರ್ಮಿತ ಕಾರಣಗಳೂ ಇವೆ.   

ಮಾನವ  ಪ್ರತಿಯೊಂದಕ್ಕೂ ಪ್ರಕೃತಿಯನ್ನೇ ಅವಲಂಬಿಸಿದ್ದಾನೆ. ನಾವು ನಮ್ಮ ದಿನನಿತ್ಯದ ಅಗತ್ಯಗಳಾದ ಆಹಾರ, ಬಟ್ಟೆ, ಗಾಳಿ, ಬೆಳಕು, ಔಷಧ ಮುಂತಾದ ಜೀವನಾವಶ್ಯಕ ಸಕಲ ಸೌಕರ್ಯಗಳಿಗೂ ಪ್ರಕೃತಿಯೇ ಜೀವನಾಧಾರವಾಗಿದೆ. ಮಾನವರಾದ ನಾವು ನಮ್ಮ ಅಜ್ಞಾನ, ದುರಾಸೆ, ದುಂದುಗಾರಿಕೆ ಹಾಗೂ ಮೋಜುಮಸ್ತಿಗಳಿಗಾಗಿ ಇಂತಹ ಅಮೂಲ್ಯವಾದ ಪರಿಸರವನ್ನು ನಾಶ ಮಾಡಿದರೆ ಅಸಮತೋಲನ ಉಂಟಾಗುತ್ತದೆ. ಆದ್ದರಿಂದ ಈ ಸುಂದರ ಪರಿಸರದ ಸಂರಕ್ಷಣೆಯ ಜವಾಬ್ದಾರಿ ನಮ್ಮ ಮೇಲಿದೆ

1. ಆಧುನಿಕ ಕೈಗಾರಿಕಾ ಸ್ಥಾವರದ ರಚನಾ ವಿನ್ಯಾಸದಲ್ಲಿ ಕಶ್ಮಲ ಕಳೆಯುವುದು ತುಂಬ ಮುಖ್ಯವಾದುದು. ಘನಪದಾರ್ಥಗಳಲ್ಲಿ ತೇಲುವಂಥವು, ಯಾಂತ್ರಿಕವಾಗಿ ಪ್ರತ್ಯೇಕಿಸಬೇಕು, ಮುಳುಗುವಂಥದನ್ನು ವಿಶಿಷ್ಟ ಕೋಶಗಳಲ್ಲಿ ಕೆಳಗಿಳಿಸಿ ಬೇರ್ಪಡಿಸಬೇಕು. ಕೈಗಾರಿಕಾ ಕಶ್ಮಲದ ದುಷ್ಪರಿಣಾಮಗಳ ಬಗ್ಗೆ ವಿಶೇಷ ಗಮನ ಕೊಡುವುದು ಅಗತ್ಯ
2. ಅರಣ್ಯಗಳು ಜನರ ಶ್ವಾಸಕೋಶಗಳು. ಇವುಗಳು ಊನವಾದರೆ ಜನರ ಜೀವನ ದುಸ್ಸಾಹಸವೇ ಸರಿ. ಆದುದರಿಂದ ಅವುಗಳ ರಕ್ಷಣೆ ಪ್ರತಿಯೊಬ್ಬನ ಆದ್ಯ ಕರ್ತವ್ಯವಾಗಿದೆ. ಅರಣ್ಯನಾಶವನ್ನು ತಡೆಗಟ್ಟಬೇಕು
3. ವನಮಹೋತ್ಸವದ ಮೂಲಕ ಹೆಚ್ಚು ಹೆಚ್ಚು ಗಿಡಗಳನ್ನು ನೆಡಬೇಕು. ಅರಣ್ಯ ರಕ್ಷಣೆ ಮಾಡಿ ಇಡೀ ಜಗತ್ತನ್ನು ಅಪಾಯದಿಂದ ಮಾಡಬೇಕಾದ ಜವಾಬ್ದಾರಿ ನಮ್ಮ ಕೈಯಲ್ಲಿದೆ. ಇದಕ್ಕೆ ಪ್ರತಿಯೊಬ್ಬರೂ ಕೈ ಜೋಡಿಸಬೇಕು.
4. ನಮಗೆ ನೀರು ದೊರೆಯುವ ಮೂಲಗಳನ್ನು ಸೂಕ್ತ ರೀತಿಯಲ್ಲಿ ಸಂರಕ್ಷಿಸಬೇಕು. ಕೆರೆ ಕಟ್ಟೆಗಳಲ್ಲಿನ ನೀರನ್ನು ಕೊಳಕು ಮಾಡಬಾರದು. ಬಾವಿಯನ್ನು ಸುತ್ತಲೂ ಕಟ್ಟೆ ಕಟ್ಟುವುದರ ಮೂಲಕ ರಕ್ಷಿಸಬೇಕು. ಆದಷ್ಟು ಕೊಳವೆ ಬಾವಿಯನ್ನು ತೋಡಿಸಬೇಕು. ಕುಡಿಯುವ ನೀರನ್ನು ಶುದ್ಧವಾಗಿಡುವುದು ಇಡೀ ಸಮುದಾಯದ ಜವಾಬ್ದಾರಿ.
5. ನಮ್ಮ ಮನೆಯ  ಸುತ್ತಮುತ್ತಲಿನ ಜಾಗವನ್ನು ಸ್ವಚ್ಚವಾಗಿ ಇಡುವುದು ಪ್ರತಿಯೊಬ್ಬರ ಜವಾಬ್ದಾರಿಯಾಗಿದೆ. ಮನೆಯ ಹಿಂದೆ ಮುಂದೆ ಜಾಗವಿದ್ದರೆ ಕೈ ತೋಟ ಮಾಡುವುದುಉತ್ತಮ. ಸೂಕ್ತ ರೀತಿಯಲ್ಲಿ ಗೊಬ್ಬರದ ಗುಂಡಿಗಳನ್ನು ನಿರ್ಮಿಸಿ ಸಗಣಿ ಮತ್ತು ಇತರ ಅನುಪಯುಕ್ತ ವಸ್ತುಗಳನ್ನು ಅದರಲ್ಲಿ ಹಾಕಬೇಕು.
6. ಶೌಚಾಲಯಗಳ ಪಾತ್ರ ಅತಿ ಮುಖ್ಯ. ನೈರ್ಮಲ್ಯದಿಂದ ಕೂಡಿದ ಶೌಚಗೃಹಗಳಿಂದ ಅನೇಕ ರೋಗ ರುಜಿನಗಳು ಹರಡುವುದನ್ನು ತಡೆಗಟ್ಟಬಹುದು.

ಈ ನಮ್ಮ ಭೂಮಿ ಮುಂದಿನ ಪೀಳಿಗೆಗೆ ಹಸಿರು ಕಾಡುಗಳನ್ನು, ಶುದ್ಧವಾದ ಗಾಳಿ, ನೀರನ್ನು ಹೊಂದಿರಬೇಕೆಂದರೆ ನಾವು ನಮ್ಮ ಪರಿಸರವನ್ನು ರಕ್ಷಿಸಿ ಕೊಳ್ಳಬೇಕು. ಈಗಲೇ ನಾವು ಎಚ್ಚೆತ್ತುಕೊಂಡು ನಮ್ಮ ಸುತ್ತ ಮುತ್ತಲಿನವರಲ್ಲೂ ಜಾಗೃತಿ ಮೂಡಿಸುವುದು ಅನಿವಾರ್ಯ. ನಮ್ಮ ನಡಿಗೆ ಸ್ವಚ್ಛ ಪರಿಸರದೆಡೆಗೆ ಇರಬೇಕು.

 

ಹೇಮಂತ ಋತು

ಮೊದಲೆಲ್ಲಾ ದಸರೆಯ ಹಬ್ಬ ಪ್ರಾರಂಭವಾಗುವ ಹತ್ತು ಹದಿನೈದು ದಿನಗಳ ಮುಂಚೆಯೇ ಚಳಿಯ ಆಗಮನವಾಗುತಿತ್ತು. ಜಾಗತೀಕ ತಾಪಮಾನದಲ್ಲಿ ಏರಿಕೆಯ ಪ್ರಭಾವದಿಂದ ಈ ನಡುವೆ  ಚಳಿಗಾಲವು ಸ್ವಲ್ಪ ತಡವಾಗಿ ಅಂದರೆ ನವಂಬರ್ ವರೆಗೆ ಪ್ರಾರಂಭವಾಗುವುದು .  ಮಾರ್ಗಶಿರ, ಪುಷ್ಯ, ಮಾಘ, ಫಾಲ್ಗುಣ ಈ ನಾಲ್ಕು ಮಾಸಗಳು ಚಳಿಗಾಲದ ಅವಧಿಯೇ. ಚಳಿಗಾಲ ಹೆಚ್ಚುತ್ತಿದ್ದಂತೆ ಉದ್ದು, ಹಾಗೂ ಬಟಾಣಿ ಗಿಡಗಳಲ್ಲಿ ಕೆಂಪು-ಹಳದಿ ಹೂವುಗಳು ಅರಳ ತೊಡಗುತ್ತವೆ. ಅಗಸೆಯ ಮರಗಳಲ್ಲಿ ನೀಲಿಯ ಹೂವುಗಳು ನಳನಳಿಸುತ್ತವೆ. ಕಬ್ಬಿನ ತೋಟಗಳು ಆಳೆತ್ತರದ ಕಬ್ಬಿನ ಜಲ್ಲೆಗಳಿಂದ ತುಂಬಿ ಹೋಗುತ್ತವೆ. ಅಂದರೆ ಚಳಿಗಾಲ ಜನರಿಗೆ ಚಳಿಯ ನಡುಕವನ್ನು ಕಂಡರೂ, ಪ್ರಕೃತಿಯ ಸೊಬಗಿಗೆ ಬಾಧಕ ಎನಿಸುವುದಿಲ್ಲ.

ಇಷ್ಟೆಲ್ಲಾ ಲಕ್ಷಣ ಹೊಂದಿದ ಹೇಮಂತ ಋತುವಿನ ಪ್ರಾರಂಭವಾಗುತ್ತಿದ್ದಂತೆಯೇ, ಮನೆಯ ಮಾಳಿಗೆಯ ಮೇಲೆ ತೆರೆದ ಗಾಳಿಗೆ ಮಲಗುತ್ತಿದ್ದವರು ಮನೆಯೊಳಗಿನ ಕೋಣೆಯೊಳಗೆ ಮಲಗಲು ತವಕಿಸುತ್ತಾರೆ. ಪೆಟ್ಟಿಗೆಗಳಲ್ಲಿ ಇಟ್ಟಿದ್ದ ಸ್ವೆಟರ್ ಗಳೆಲ್ಲ ಹೊರಬಂದು ಮೈಯನ್ನು ಬೆಚ್ಚಗಾಗಿಸುತ್ತವೆ. ಹಿರಿಯರು ಶಾಲು ಹೊದೆಯದೆ ಹೊರಗೆಲ್ಲೂ ಹೋಗುವುದಿಲ್ಲ. ಚಳಿಗಾಲದಲ್ಲಿ ಹಗಲ ವೇಳೆ ಕಡಿಮೆ ಕತ್ತಲು ಬೇಗನೆ ಆವರಿಸುತ್ತದೆ.

ಚಳಿಯೂ ಹೆಚ್ಚಾದಾಗ, ಹೊದಿಕೆ ಹೊದ್ದು ಮಲಗಿದ್ದರೂ ಅದರಲ್ಲಿಯೇ ಚಳಿಗಾಳಿಯು ತೂರಿ ಬರುವಂತೆ ಭಾಸವಾಗುತ್ತದೆ. ಆಗ ಜನರು ಇನ್ನೂ ಬೆಚ್ಚಗಿರುವ ಕಂಬಳಿಗಳನ್ನು ಹೊದ್ದು ಮಲಗುವರು. ಚಳಿಯ ಬಾಧೆಯನ್ನು ತಾಳಲಾರದೆ ಕಟಕಟನೆ ಹಲ್ಲುಗಳನ್ನು ಕಡೆಯುತ್ತಿರುತ್ತಾರೆ. ಮುಂಜಾನೆ ಎದ್ದ ಕೂಡಲೇ ಬಿಸಿಬಿಸಿ ಕಾಫಿ ಕುಡಿಯ ಬಯಸುತ್ತಾರೆ. ಚಳಿಗಾಲದಲ್ಲಿ ಹಸಿವು ಕೂಡ ಹೆಚ್ಚಾಗುತ್ತದೆ. ಹಾಗೆಯೇ ಸಂಜೆಯ ಚಳಿಯಲ್ಲಿ ಎಣ್ಣೆಯಲ್ಲಿ ಕರಿದ ಬಿಸಿಬಿಸಿ ಬಜ್ಜಿ, ಬೋಂಡಾ ಇಂಥವುಗಳನ್ನು ತಿನ್ನಲು ಜನರು ಹಪಹಪಿಸುತ್ತಿರುತ್ತಾರೆ. ನಗರಗಳಲ್ಲಿ ಉಣ್ಣೆಯ ಉಡುಪುಗಳನ್ನು ಧರಿಸಿ ಕೆಲಸಕ್ಕೆ ಹೋಗುತ್ತಿದ್ದರೆ, ಹಳ್ಳಿಗಳಲ್ಲಿ ಕೆಲಸ ಮಾಡುವ ಹೊಲಗಳ ಬಳಿಯೇ ಇರುವಂತಹ ಒಣಕಡ್ಡಿಗಳನ್ನು ಗುಡ್ಡೆ ಮಾಡಿ, ಬೆಂಕಿ ಹೊತ್ತಿಸಿ, ಮೈ ಕೈಗಳಿಗೆ ಶಾಖ ಕೊಡುತ್ತಿರುತ್ತಾರೆ.

ಚಳಿಯಲ್ಲಿ ಶೇಂಗಾ ಮತ್ತು  ಬೆಲ್ಲದ ಮಿಠಾಯಿ 

ನಮ್ಮ ದೇಶದಲ್ಲಿ ದೀಪಾವಳಿ ಚಳಿಗಾಲದಲ್ಲಿ ಆಚರಿಸಲ್ಪಡುವ ಸಂಭ್ರಮದ  ಹಬ್ಬವಾಗಿದೆ. ಹಬ್ಬದ ಅಭ್ಯಂಜನ ಚಳಿಗಾಲದಲ್ಲಿ ಒಣಗಿದ ತ್ವಚೆಗೆ ಹಿತಕಾರಿಯಾದರೆ, ಕರಿದ ತಿಂಡಿಗಳು ಮತ್ತು ಸಿಹಿ ತಿನಿಸುಗಳು ದೇಹಕ್ಕೆ ಬೇಕಾದ ಕೊಬ್ಬಿನ ಅಂಶವನ್ನು ಒದಗಿಸುತ್ತವೆ.  ಡಿಸೆಂಬರ್ ನಂತರ ಸುಗ್ಗಿಯೂ ಮುಗಿದು ರೈತರಿಗೆಲ್ಲ ವಿಶ್ರಾಂತಿಯ ಕಾಲವಾಗಿರುತ್ತದೆ ಆದ್ದರಿಂದ ಜಾತ್ರೆ ಹಾಗೂ ರಥೋತ್ಸವಗಳು ಕಳೆಗಟ್ಟುತ್ತವೆ.  ಶಾಲಾಮಕ್ಕಳ ಪ್ರವಾಸಕ್ಕೆ ಕೂಡ ಇದು ಸಕಾಲ. ಸಂಕ್ರನ್ತಿಯೊಂದಿಗ್ಗೆ ಚಳಿ ಇಳಿಮುಖವಾಗತೊಡಗುತ್ತದೆ.

ದಕ್ಷಿಣ ಭಾರತಕ್ಕೆ ಹೋಲಿಸಿದರೆ ಉತ್ತರ ಭಾರತದಲ್ಲಿ ಚಳಿಯ ಪ್ರಭಾವ ಹೆಚ್ಚು. ಅಲ್ಲಿ ಮುಂಜಾನೆ ಮತ್ತು ರಾತ್ರಿ  ದಟ್ಟವಾದ ಮಂಜು ಕವಿದಿರುತ್ತದೆ. ಅಂಥಹ ಮರಗಟ್ಟುವ ವಾತಾವರಣದಲ್ಲಿಯೇ ಮಕ್ಕಳು ಶಾಲೆಗೆ ಮತ್ತು  ಜನರು ತಮ್ಮ ತಮ್ಮ ಕೆಲಸಗಳಿಗೆ ದಪ್ಪನೆಯ ಉಣ್ಣೆಯ ವಸ್ತ್ರಗಳನ್ನು ಧರಿಸಿ ಹೊರಡುತ್ತಾರೆ. ರಾತ್ರಿಯ ವೇಳೆ ತುಂಬಾ ಚಳಿ ಇರುವುದರಿಂದ ಕೆಲಸಕಾರ್ಯಗಳನ್ನು ಹಗಲೇ ಮಾಡಿ ಮುಗಿಸಿಕೊಳ್ಳುತ್ತಾರೆ.

ಮುಂಜಾನೆಯ ಮಂಜಿನಲ್ಲಿ ಶಾಲೆಗೆ 

 ಆದರೆ ಎಷ್ಟೇ ಚಳಿ ಇದ್ದರೂ ಆಡುವ ಹುಡುಗರಿಗೆ ಮಾತ್ರ ಇದರ ಪರಿವೆಯೇ ಇರುವುದಿಲ್ಲ. ಎಷ್ಟೇ ಚಳಿಯಿದ್ದರೂ ಗಂಟೆಗಟ್ಟಲೆ ಮೈದಾನದಲ್ಲಿ ಆಡುತ್ತಲೇ ಇರುತ್ತಾರೆ. ಇವರಿಗೆ ದಣಿವೇ ಇರುವುದಿಲ್ಲ. ಚಳಿಗಾಲದಲ್ಲಿ ಬಾದಾಮಿ, ಪಿಸ್ತಾ, ಗೋಡಂಬಿ, ಖರ್ಜೂರ, ಕಡಲೆಕಾಯಿ ತಿನ್ನಲು ಬಲು ರುಚಿ ಹಾಗೂ ಮೈಗೂ ಹಿತಕರ. ಶೀತ ಕಾಲ ವ್ಯಾಸಂಗಕ್ಕೆ ತುಂಬಾ ಉತ್ಸಾಹದಾಯಕ.

ಅರಣ್ಯ ಸಂರಕ್ಷಣೆ

  

PC: Kirti Sharma

ಭೂಮಿ ದಿನವನ್ನು ಇದೇ 2021 ಏಪ್ರಿಲ್ 22 ರಂದು ವಿಶ್ವಾದ್ಯಂತ ಆಚರಿಸಲಾಗುತ್ತಿದೆ. 1970 ರಲ್ಲಿ ಮೊದಲ ಭೂಮಿ ದಿನ ಆಚರಿಸಲಾಯಿತು. 193 ರಾಷ್ಟ್ರಗಳಲ್ಲಿ  ಈ ದಿನ ಆಚರಿಸಲಾಗುತ್ತದೆ. ಈ ವರ್ಷದ ಭೂ ದಿನದ ಥೀಮ್ "ಭೂಮಿಯ ಮರುಸ್ಥಾಪನೆ" ಅಥವಾ "Restore The Earth" ಆಗಿದೆ. ಅರಣ್ಯಗಳು ಭೂಮಿಯನ್ನು  ಮತ್ತೆ ಆರೋಗ್ಯಕರವಾಗಿ ಉಸಿರಾಡುವಂತೆ ಮಾಡಬಲ್ಲವು.  ಏಕೆಂದರೆ ಅರಣ್ಯಗಳು ಭೂಮಿಯ  ಶ್ವಾಸಕೋಶಗಳು. ಇವುಗಳು ಊನವಾದರೆ ಜನರ ಜೀವನ ದುಸ್ಸಾಹಸವೇ ಸರಿ. ಆದುದರಿಂದ ಅವುಗಳ ರಕ್ಷಣೆ ಪ್ರತಿಯೊಬ್ಬನ ಆದ್ಯ ಕರ್ತವ್ಯವಾಗಿದೆ. ಅರಣ್ಯಗಳು ಭೂಭಾಗದೆಲ್ಲೆಡೆ ಸಮಾನವಾಗಿ ರೂಪಿತವಾಗಿರದಿದ್ದರೂ ಲಾಭ ಮಾತ್ರ ಎಲ್ಲರಿಗೂ ಸಮಾನವಾಗಿದೆ.

ಅರಣ್ಯಗಳು ಮಾನವನಿಗೆ ಶುದ್ಧ ಹವೆಯನ್ನು ನೀಡುವುದಷ್ಟೇ ಅಲ್ಲ, ಮಳೆಯ ಮಾರುತಗಳನ್ನು ಮಳೆಯನ್ನಾಗಿ ಪರಿವರ್ತಿಸುವ ಮಾಧ್ಯಮಗಳೆಂದರೆ ತಪ್ಪಾಗಲಾರದು. ಮಿತಿಮೀರಿ ಬೆಳೆಯುತ್ತಿರುವ ಜನಸಂಖ್ಯೆ ತನ್ನ ಅಗತ್ಯಗಳ ಪೂರೈಕೆಗಾಗಿ ಕಾಡುಗಳನ್ನು ಬರಿದು ಮಾಡುತ್ತಿದೆ.

ದುಷ್ಪರಿಣಾಮಗಳು: ಅರಣ್ಯನಾಶದಿಂದ ಪ್ರಾಣಿಜಗತ್ತಿಗೆ ಅತ್ಯವಶ್ಯಕವಾಗಿ ಬೇಕಾದ ಶುದ್ಧ ಹವೆ ಅಪೇಕ್ಷಿತ ಪ್ರಮಾಣದಲ್ಲಿ ಲಭಿಸುವುದಿಲ್ಲ. ವಾಯುವಿನಲ್ಲಿ ಇಂಗಾಲದ ಡೈ ಆಕ್ಸೈಡ್ ಪ್ರಮಾಣವು ಕ್ರಮೇಣ ಜಾಸ್ತಿಯಾಗಿ ಜನರ ಉಸಿರಾಟಕ್ಕೆ ತೊಂದರೆಯಾಗುವುದು. ಮಾನವನ ಉಸಿರಾಟಕ್ಕೆ ಧಕ್ಕೆ ಉಂಟಾದರೆ ಇನ್ನು ಬದುಕು ಹೇಗೆ ಹಸನಾದೀತು? ಇಂಗಾಲದ ಡೈ ಆಕ್ಸಡ್‌ನ ಪ್ರಮಾಣ ವಾತಾವರಣದಲ್ಲಿ ಹೆಚ್ಚಿದಂತೆ ಉಷ್ಣಾಂಶವೂ ಹೆಚ್ಚುತ್ತದೆ. ತತ್ಪಲವಾಗಿ ವಾತಾವರಣದಲ್ಲಿನ ಉಷ್ಣತೆಯೂ ಹೆಚ್ಚಾಗುತ್ತದೆ. ಇದರಿಂದಾಗಿ ಧ್ರುವ ಪ್ರದೇಶಗಳಲ್ಲಿ ಸಂಗ್ರಹವಾಗಿರುವ ಹಿಮರಾಶಿ ಕರಗಿ ನೀರಾಗಿ ಹರಿದು ಸಾಗರಗಳ ಮಟ್ಟವು ಏರಿ ಕರಾವಳಿ ಪುದೇಶಗಳಲ್ಲಿ ವಾಸಿಸುತ್ತಿರುವ ಜನ-ಜಾನುವಾರುಗಳು ನೀರು ಪಾಲಾಗುತ್ತವೆ.

ಅರಣ್ಯದ ಉತ್ಪನ್ನಗಳು ಸಾಕಷ್ಟು ಪ್ರಮಾಣದಲ್ಲಿ ಲಭಿಸದೆ ಜನಜೀವನ ಅಸ್ತವ್ಯಸ್ತವಾಗುವುದು. ಮರಮುಟ್ಟು, ಉರುವಲು ಇತ್ಯಾದಿಗಳಿಗೆ ಬಳಸಲಾಗುವ ಮರಗಳು ಇಲ್ಲದಾಗುತ್ತವೆ. ಅದನ್ನಾಶ್ರಯಿಸಿದ ಕೈಗಾರಿಕೆಗಳು ಸ್ಥಗಿತಗೊಳ್ಳುತ್ತವೆ. ಅವುಗಳನ್ನೇ ಅವಲಂಬಿಸಿದ ಕುಟುಂಬಗಳು ಬೀದಿಗೆ ಬೀಳುತ್ತದೆ. ವನ್ಯಪ್ರದೇಶವಿಲ್ಲದ ಮೇಲೆ ವನ್ಯಜೀವಿಗಳಿಗೆ ತಾವೆಲ್ಲಿಯದು? ವನ್ಯಜೀವಿಗಳು ಜನಜೀವನದ ಮೇಲೆ ಧಾಳಿ ಮಾಡುತ್ತವೆ. ತಮ್ಮ ಉಳಿವಿಗಾಗಿ ಹೋರಾಟ ಹಾಗೂ ಬೆಳೆಗಳ ಮೇಲೆ ಕಾಡು ಪ್ರಾಣಿಗಳು ದಾಳಿ ಮಾಡಿ ಮಾನವನ ಜೀವನವನ್ನು ನರಕಸದೃಶಗೊಳಿಸುವುದಿಲ್ಲವೇ?

ಅರಣ್ಯ ರಕ್ಷಣೆ: ಮಾನವನು ಸೃಷ್ಟಿಯಲ್ಲಿ ಕಿರೀಟಪ್ರಾಯನಾದವನು (Man is the Crown of Creation). ಆದುದರಿಂದ ಅರಣ್ಯ ರಕ್ಷಣೆಯು ಬುದ್ಧಿವಂತನಾದ ಮಾನವನ ಮೂಲಭೂತ ಕರ್ತವ್ಯವಾಗಿದೆ. ಅರಣ್ಯ ರಕ್ಷಣೆ ಮಾಡಿ ಇಡೀ ಜಗತ್ತನ್ನು ಅಪಾಯದಿಂದ ಪಾರು ಮಾಡಬೇಕಾದ ಜವಾಬ್ದಾರಿ ನಮ್ಮ ಕೈಯಲ್ಲಿದೆ. ಇದಕ್ಕೆ ಪ್ರತಿಯೊಬ್ಬರೂ ಕೈ ಜೋಡಿಸಬೇಕು.

ವಸಂತ ಋತು

PC: Kirti Sharma 

 ನಮ್ಮ ಭಾರತದಲ್ಲಿ ಒಂದು ವರ್ಷವನ್ನು ಆರು ಋತುಗಳಿಗೆ ವಿಂಗಡಿಸಿದ್ದಾರೆ. ಅವುಗಳೆಂದರೆ: ಹೇಮಂತ, ಶಿಶಿರ, ವಸಂತ, ಗ್ರೀಷ್ಮ, ವರ್ಷ, ಶರದ್ ಋತುಗಳು. ಈ ಆರು ಋತುಗಳಲ್ಲಿ ವಸಂತ ಋತು ತುಂಬಾ ಹಿತಕಾರಿ ಎನಿಸಿದೆ. ಇದನ್ನು 'ಋತುಗಳ ರಾಜ' ಎಂದೇ ಕರೆಯುತ್ತಾರೆ. ಆದ್ದರಿಂದಲೇ ನಮ್ಮ ಪ್ರಸಿದ್ಧ ಕವಿ ಬಿ.ಎಂ.ಶ್ರೀ.ಯವರು "ವಸಂತ ಬಂದ ಋತುಗಳ ರಾಜ ತಾ ಬಂದ" ಎಂಬ ಕವಿತೆಯಲ್ಲಿ  ವಸಂತ ಋತುವಿನ ಸೌಂದರ್ಯವನ್ನು ಬಣ್ಣಿಸಿದ್ದಾರೆ.

ವಸಂತ ಕಾಲದಲ್ಲಿ ಪ್ರಕೃತಿಯು ಅತ್ಯಂತ ಸುಂದರವಾಗಿ ಕಾಣುತ್ತದೆ. ಎಲ್ಲೆಡೆ ಗಿಡ ಮರಗಳಲ್ಲಿ ಚಿಗುರೆಲೆಗಳು ಪ್ರಕೃತಿ ದೇವಿಗೆ ಹಸಿರು ಸೀರೆಯನ್ನು ಉಡಿಸಿದಂತೆ ಕಾಣುತ್ತದೆ. ವಿವಿಧ ವರ್ಣದ ಎಲೆಗಳ ಮರೆಯಲ್ಲಿ ನಗುವ ಹೂಗಳು ನೇತ್ರಾನಂದಕರವಾಗಿ ಕಾಣುತ್ತವೆ. ಮಾಮರಗಳಿಂದ ಹರಡುವಂತಹ ಸುವಾಸನೆಯ ಎಲ್ಲರನ್ನೂ ಸೆಳೆಯುತ್ತದೆ. ಮರದ ಟೊಂಗೆಗಳು ಪತ್ರ-ಪುಷ್ಪಗಳೊಂದಿಗೆ ತಲೆದೂಗುತ್ತಾ ಆನಂದವನ್ನು ಹಂಚುತ್ತವೆ. ಟೊಂಗೆಗಳ ಮೇಲೆ ಕೋಗಿಲೆಗಳು ಕುಳಿತು 'ಕುಹು' ರಾಗವನ್ನು ತಮ್ಮದೇ ಆದ ರೀತಿಯಲ್ಲಿ ಹಾಡುತ್ತಿರುತ್ತವೆ. ಇದನ್ನು ಕೇಳಲು ಹಾಗೂ ನೋಡಲು ನಮ್ಮ ಆನಂದಕ್ಕೆ ಪಾರವೇ ಇಲ್ಲ.

ವಸಂತ ಋತುವಿನಲ್ಲಿ ಉದಾಸೀನ ಭಾವನೆಗಳೆಲ್ಲವೂ ಮಾಯವಾಗುತ್ತದೆ. ಈ ಋತುವಿನಲ್ಲಿ ಪ್ರಕೃತಿಯಲ್ಲಿ ಸಂಚರಿಸುತ್ತಿದ್ದರೆ ನಾವು ಮನ್ಮಥ ದೇವರೊಂದಿಗೇ ತಿರುಗಾಡುತ್ತಿದ್ದೇವೆ ಎಂದು ಭಾಸವಾಗುತ್ತದೆ. ಇಂತಹ ಹಾವ-ಭಾವ ಬೇರೆ ಯಾವ ಋತುವಿನಲ್ಲೂ ಇಲ್ಲ. ಶರೀರದಲ್ಲಿ ಅಗೋಚರ ರೂಪದ ಶಕ್ತಿ ಸಂಚಾರವಾಗಿ ಮನಸ್ಸಿನಲ್ಲಿ ಆನಂದದ ಅಲೆಗಳು ಮೂಡಿಸುತ್ತವೆ. ವಸಂತ ಸಮಯದಲ್ಲಿ ಪಶು-ಪಕ್ಷಿಗಳು ಅಪೂರ್ವ ಆನಂದದ ಸ್ವಾದವನ್ನು ಸವಿಯುತ್ತವೆ. ಅವುಗಳ ಓಡಾಟ-ಹಾರಾಟದಲ್ಲಿ ಎಲ್ಲಿಲ್ಲದ ಉತ್ಸಾಹ, ಉಲ್ಲಾಸ. ಪಕ್ಷಿಗಳು ಆನಂದದಲ್ಲಿ ಮುಳುಗಿ, ಸುಮಧುರ ಸಂಗೀತದ ಧ್ವನಿಯನ್ನು ಹೊರಡಿಸುತ್ತವೆ. ದುಂಬಿಗಳು ಸಹ ಹೂವುಗಳ ಮೇಲೆ ಸುತ್ತುತ್ತಿರುತ್ತವೆ. ಬಣ್ಣ ಬಣ್ಣದ ಭ್ರಮರಗಳು ಹೂವಿಂದ ಹೂವಿಗೆ ಹಾರಾಡುತ್ತ ಪರಾಗಸ್ಪರ್ಶ ಮಾಡುತ್ತಿರುತ್ತವೆ.

ಇಂತಹ ಮಧುರ ಭಾವವನ್ನು ತರುವಂತಹ ವಸಂತ ವರ್ಷಪೂರ್ತಿ ಇರಬಾರದೇ ಎಂದು ನಿಮಗೆ ಅನ್ನಿಸದಿರದು.

ಅಸಾಮಾನ್ಯ ಗಣಿತಜ್ಞನ ನೆನಪಿನಲ್ಲಿ —ರಾಷ್ಟ್ರೀಯ ಗಣಿತ ದಿನ

 

"ಪ್ರತಿ ಧನಪೂರ್ಣಾಂಶವೂ ರಾಮಾನುಜನ್ನರ ವೈಯಕ್ತಿಕ ಮಿತ್ರರುಗಳಲ್ಲೊಂದು" 

ಎಸ್. ರಾಮಾನುಜನ್ ಭಾರತ ಕಂಡ ಅದ್ವಿತೀಯ ಗಣಿತಜ್ಞ. ಬದುಕಿದ್ದು ಸ್ವಲ್ಪ ಕಾಲವಾದರೂ ಅವರು ಗಣಿತದ ಬಗ್ಗೆ ನಡೆಸಿದ ಪ್ರಯೋಗಗಳು, ಸಂಶೋಧನೆಗಳು ಜಗದ್ವಿಖ್ಯಾತವಾಗಿವೆ. ಇಂದಿಗೂ ರಾಮಾನುಜನ್ ಅವರನ್ನು ಗಣಿತದ ಸಂಶೋಧನೆಗಳಿಗಾಗಿ ನೆನೆಯಲಾಗುತ್ತದೆ. ಈ ಹಿನ್ನೆಲೆಯಲ್ಲಿ ರಾಮಾನುಜನ್ ಅವರು ಜನಿಸಿದ ದಿನ (ಡಿಸೆಂಬರ್ 22) ವನ್ನು ರಾಷ್ಟ್ರೀಯ ಗಣಿತ ದಿನವನ್ನಾಗಿ ಆಚರಿಸಲಾಗುತ್ತಿದೆ.

ಶ್ರೀನಿವಾಸ ರಾಮಾನುಜನ್ ತಮಿಳುನಾಡಿನ ಈರೋಡ್ ನಲ್ಲಿ 1887ರಲ್ಲಿ ಜನಿಸಿದರು. ಇವರ ತಂದೆ ಬಟ್ಟೆ ವ್ಯಾಪಾರಿಯ ಬಳಿ ಗುಮಾಸ್ತರಾಗಿ ಕೆಲಸ ಮಾಡುತ್ತಿದ್ದರು. ತಾಯಿ ಗೃಹಿಣಿ. ರಾಮಾನುಜನ್ ಹುಟ್ಟಿದ ನಂತರ ಅವರ ಕುಟುಂಬ ಕುಂಭಕೋಣಂಗೆ ವಲಸೆ ಹೋಯಿತು. ಮನೆಯಲ್ಲಿ ಬಡತನವಿದ್ದರೂ ರಾಮಾನುಜನ್ ವಿದ್ಯಾಭ್ಯಾಸದಲ್ಲಿ ತುಂಬಾ ಮುಂದಿದ್ದರು. ಹತ್ತನೇ ವಯಸ್ಸಿಗೆ ಪ್ರತಿಭಾವಂತ ವಿದ್ಯಾರ್ಥಿಯಾಗಿ ಹೊರಹೊಮ್ಮಿದ್ದರು. 

ರಾಮಾನುಜನ್ ಅವರು ಕುಂಭಕೋಣಂ ಟೌನ್ ಹೈಸ್ಕೂಲ್ ನಲ್ಲಿ ವ್ಯಾಸಂಗ ಮಾಡುತ್ತಿದ್ದಾಗ, ತಾವಾಗಿಯೇ ಗಣಿತದ ಬಗ್ಗೆ ಅಧ್ಯಯನ ಮಾಡುತ್ತಿದ್ದರು. ಪ್ರತಿಭಾವಂತ ರಾಮಾನುಜನ್ ಅವರಿಗೆ ಸ್ಕಾಲರ್ ಶಿಪ್ ದೊರೆತಿದ್ದರಿಂದ ಕುಂಭಕೋಣಂನ ಗವರ್ನಮೆಂಟ್ ಆರ್ಟ್ಸ್ ಕಾಲೇಜಿಗೆ ಸೇರಿ ವಿದ್ಯಾಭ್ಯಾಸ ಮುಂದುವರೆಸಿದರು. ಆದರೆ ಗಣಿತದ ಮೇಲಿನ ಒಲವಿನಿಂದ ಬೇರೆ ವಿಷಯಗಳಲ್ಲಿ ಅನುತ್ತೀರ್ಣರಾದರು. ಪರಿಣಾಮ ಸ್ಕಾಲರ್ ಶಿಪ್ ಕೈತಪ್ಪಿ ಹೋಯಿತು. 1905ರಲ್ಲಿ ಮದ್ರಾಸಿಗೆ ತೆರಳಿದ ರಾಮಾನುಜನ್ ಪಚೈಯಪ್ಪ ಕಾಲೇಜಿಗೆ ಸೇರಿಕೊಂಡರು. ಅಲ್ಲಿಯೂ ಅದೇ ಕಥೆ ಪುನರಾವರ್ತನೆಯಾಯಿತು. 

ಹಿರಿಯರೊಬ್ಬರ ಶಿಫಾರಸ್ಸಿನಿಂದ ಮದ್ರಾಸಿನಲ್ಲಿ ಅಕೌಂಟೆಂಟ್ ಜನರಲ್ ಕಚೇರಿಯಲ್ಲಿ ಅವರಿಗೆ ಕೆಲಸ ದೊರೆಯಿತಾದರೂ, ಅದು ಕೇವಲ ಎರಡು ತಿಂಗಳ ಮಟ್ಟಿಗೆ ಮಾತ್ರ ಇತ್ತು. ಪುನಃ ಹಸಿದ ಹೊಟ್ಟೆಯ ಬಡತನ, ಅನಾರೋಗ್ಯ ಅವರಿಗೆ ಎದುರಾಯಿತು. ಈ ನಡುವೆ ಮದ್ರಾಸಿನ ಪೋರ್ಟ್ ಟ್ರಸ್ಟ್ ಕಚೇರಿಯಲ್ಲಿ ಗುಮಾಸ್ತರಾಗಿ ಕೆಲಸ ಮಾಡಲು ಆರಂಭಿಸಿದರು. ಏತನ್ಮಧ್ಯೆ ಶ್ರೀನಿವಾಸ ರಾಮಾನುಜನ್ ಅವರ ಬೆಂಗಾವಲಾಗಿದ್ದ ಪ್ರೊ. ವಿ.ಪಿ. ಶೇಷು ಅಯ್ಯರ್ ಕಳುಹಿಸಲ್ಪಟ್ಟ ಪ್ರಶ್ನೋತ್ತರಗಳ ರೂಪದಲ್ಲಿ ಇಂಡಿಯನ್ ಮ್ಯಾಥಮೆಟಿಕಲ್ ಸೊಸೈಟಿಯ ನಿಯತಕಾಲಿಕ 1911ರಲ್ಲಿ ಪ್ರಕಟವಾಯಿತು. ಈ ಸಂಪುಟದ ಒಂದು ಸಂಚಿಕೆಯಿಂದ ರಾಮಾನುಜನ್ನರ ಬರ್ನೌಲಿ ಸಂಖ್ಯೆಗಳ ಕೆಲವು ಲಕ್ಷಣಗಳು ಪ್ರಕಟಗೊಂಡಿತು. 

ಪ್ರೊ ಪಿ.ವಿ. ಶೇಷು ಅಯ್ಯರ್ ಅವರು ಟ್ರಿನಿಟಿ ಕಾಲೇಜಿನ ಫೆಲೋ ಆಗಿದ್ದ ಪ್ರೊ. ಜಿ.ಎಚ್. ಹಾರ್ಡಿ ಮತ್ತು ಕೇಂಬ್ರಿಡ್ಜ್ ಗಣಿತ ಉಪನ್ಯಾಸಕರಾಗಿದ್ದ ಕ್ಯಾಲೆ ಅವರಿಗೆ ರಾಮಾನುಜನ್ ತಮ್ಮ ಗಣಿತೀಯ ಶೋಧನೆಗಳನ್ನು ತಿಳಿಸಬೇಕೆಂದು ಒತ್ತಾಯಿಸಿದರು. ಇದು ಅವರ ಜೀವನದ ದಿಕ್ಕನ್ನೇ ಬದಲಿಸಿತು. ತಮ್ಮ ಮೊದಲ ಪತ್ರದಲ್ಲೇ ರಾಮಾನುಜನ್ ನೂರಕ್ಕೂ ಹೆಚ್ಚು ಪ್ರಮೇಯಗಳನ್ನು ವಿವರಿಸಿದ್ದರು. ಕ್ರಮೇಣ ಶ್ರೀನಿವಾಸನ್ ಕೇಂಬ್ರಿಡ್ಜ್ ಗೆ ಬಂದಿಳಿದರು. 1916ಲ್ಲಿ ಬ್ಯಾಚುಲರ್ ಆಫ್ ಸೈನ್ಸ್ ಪದವಿ ಪಡೆದ ರಾಮಾನುಜನ್ 1918ರಲ್ಲಿ ಲಂಡನ್ನಿನ ರಾಯಲ್ ಸೊಸೈಟಿಯ ಸದಸ್ಯರಾದರು. ರಾಮಾನುಜನ್ ಅವರು ನಂಬರ್ ಥಿಯರಿ, ಅವಿಭಾಜ್ಯ ಸಂಖ್ಯೆಗಳು , ಗಣಿತದ ಸೂತ್ರಗಳು ಮತ್ತು ಪಾರ್ಟಿಷನ್ ಸಂಖ್ಯೆಗಳ ಬಗ್ಗೆ ಸಂಶೋಧನೆ ನಡೆಸಿದ್ದರು.

ಆದರೆ ದುರದೃಷ್ಟವಶಾತ್ ಅವರ ಆರೋಗ್ಯ ದಿನೇ ದಿನೇ ಕ್ಷೀಣಿಸುತ್ತಿತ್ತು. ರಾಮಾನುಜಂ ಆಸ್ಪತ್ರೆಯಲ್ಲಿ ಅವರ ಕೊನೆಯ ದಿನಗಳಲ್ಲಿದ್ದಾಗ. ಅವರ ಸ್ನೇಹಿತ ಹಾರ್ಡಿ ಅವರನ್ನು ಭೇಟಿ ಮಾಡಿದ. ಮತ್ತು ಅವರು ತೆಗೆದುಕೊಂಡ ಟ್ಯಾಕ್ಸಿ ಸಂಖ್ಯೆಯಲ್ಲಿ 1729 ಸಂಖ್ಯೆ ಇದೆ ಎಂದು ಹೇಳಿದರು. ಆಗ ರಾಮಾನುಜಮ್ ಇದು ತುಂಬಾ ವಿಶಿಷ್ಟವಾದ ಸಂಖ್ಯೆ ಎಂದು ಹೇಳಿದರು. 

1729 = 1x1x1 + 12x12x12

1729 = 9 × 9 × 9 + 10x10x10

ಇದು 2 ಘನಗಳ ಮೊತ್ತವಾದ ಚಿಕ್ಕ ಸಂಖ್ಯೆ.

1729 ಅನ್ನು ರಾಮಾನುಜಮ್ ಮತ್ತು ಹಾರ್ಡಿ ಸಂಖ್ಯೆ ಎಂದೂ ಕರೆಯುತ್ತಾರೆ

ಉತ್ತಮ ವೈದ್ಯಕೀಯ ಸೌಲಭ್ಯ ಗಳ ಹೊರತಾಗಿಯೂ ಅವರು ಏಪ್ರಿಲ್ 26, 1920 ರಂದು ತಮ್ಮ 32 ವರ್ಷಗಳ ಸಣ್ಣ ವಯಸ್ಸಿನಲ್ಲೇ ಇಹ ಲೋಕವನ್ನು ತ್ಯಜಿಸಿದರು.